Stock News: இந்திய பங்குச் சந்தையில் ஏறுமுகம் - பாசிட்டிவ் போக்கு தொடருமா?

ஆசிய பங்குச் சந்தைகளின் ஏற்றத்தின் எதிரொலியாக இந்திய பங்குச் சந்தை வர்த்தகம் ஏறுமுகம் கண்டுள்ளது. சென்செக்ஸ் 300+ புள்ளிகள் உயர்ந்துள்ளது. இந்த பாசிட்டிவ் போக்கு தொடருமா என்ற எதிர்பார்ப்பு நிலவுகிறது.

Monday March 10, 2025 , 2 min Read

ஆசிய பங்குச் சந்தைகளின் ஏற்றத்தின் எதிரொலியாக இந்திய பங்குச் சந்தை வர்த்தகம் ஏறுமுகம் கண்டுள்ளது. சென்செக்ஸ் 300+ புள்ளிகள் உயர்ந்துள்ளது. இந்த பாசிட்டிவ் போக்கு தொடருமா என்ற எதிர்பார்ப்பு நிலவுகிறது.

மும்பை பங்குச் சந்தையில் இன்று (மார்ச் 10) காலை வர்த்தகம் தொடங்கும்போது, சென்செக்ஸ் 324.67 புள்ளிகள் உயர்ந்து 74,657.25 ஆக இருந்தது. அதேவேளையில், தேசிய பங்குச் சந்தையில் நிஃப்டி 98.45 புள்ளிகள் உயர்ந்து 22,650.95 ஆக இருந்தது.

வாரத்தின் முதல் நாளிலேயே வர்த்தகம் தொடங்கியதில் இருந்து பங்குச் சந்தையில் ஏற்றம் நிலவி வருவது முதலீட்டாளர்களுக்கு நிம்மதி அளித்துள்ளது.

இன்று முற்பகல் 11 மணியளவில் சென்செக்ஸ் 317.95 புள்ளிகள் (0.43%) உயர்ந்து 74,650.52 ஆகவும், நிஃப்டி 89.60 புள்ளிகள் (0.40%) உயர்ந்து 22,642.10 ஆகவும் இருந்தது.

காரணம் என்ன?

அமெரிக்க பங்குச் சந்தையில் வெள்ளிக்கிழமை வர்த்தகம் உயர்வுடன் நிறைவு பெற்றது. ஆசிய பங்குச் சந்தைகளைப் பொறுத்தவரையில் டோக்கியோ மற்றும் சியோலில் உயர்வும், ஹாங்காங் மற்றும் ஷாங்காயில் இறக்கமும் நிலவுகிறது.

வெளிநாட்டு முதலீட்டாளர்களின் பங்களிப்பு குறைந்து வந்தாலும் கூட, ஆசிய பங்குச் சந்தைகளின் சாதகப் போக்குகள், உள்ளூர் முதலீட்டாளர்கள் ஆர்வம் உள்ளிட்ட காரணங்களால் இந்திய பங்குச் சந்தையில் ஏற்றம் நிலவுகிறது. இந்தப் போக்கு தொடருமா என்பது கேள்விக்குறியே என்றாலும் கூட, பெரிய அளவில் வீழ்ச்சி நிலவ வாய்ப்பில்லை என்று பங்குச் சந்தை வர்த்தகர்கள் கருத்து தெரிவித்துள்ளனர்.