Stock News: பங்குச் சந்தையில் தொடரும் ஏறுமுகம் - சென்செக்ஸ் 500+ புள்ளிகள் உயர்வு!

இந்திய பங்குச் சந்தையில் தொடர்ந்து ஏற்றம் நிலவி வருகிறது. சென்செக்ஸ் 500+ புள்ளிகள் உயர்ந்துள்ளது. இந்த சாதகப் போக்கு நீடிக்க வாய்ப்புள்ளதாக வர்த்தகர்கள் நம்பிக்கை தெரிவித்துள்ளனர்.

Friday March 21, 2025 , 2 min Read

இந்திய பங்குச் சந்தையில் தொடர்ந்து ஏற்றம் நிலவி வருகிறது. சென்செக்ஸ் 500+ புள்ளிகள் உயர்ந்துள்ளது. இந்த சாதகப் போக்கு நீடிக்க வாய்ப்புள்ளதாக வர்த்தகர்கள் நம்பிக்கை தெரிவித்துள்ளனர்.

மும்பை பங்குச் சந்தையில் இன்று (மார்ச் 21) காலை வர்த்தகம் தொடங்கும்போது, சென்செக்ஸ் 252.8 புள்ளிகள் சரிந்து 76,095.26 ஆக இருந்தது. அதேவேளையில், தேசிய பங்குச் சந்தையில் நிஃப்டி 57.85 புள்ளிகள் உயர்ந்து 23,132.80 ஆக இருந்தது.

ஆனால், சரிந்த வேகத்தில் எழுந்து மீண்டும் ஏற்றத்தில் பங்குச் சந்தை வர்த்தகம் தொடருவது முதலீட்டாளர்களுக்கு உத்வேகத்தைக் கொடுத்துள்ளது.

இன்று பகல் 12.14 மணியளவில் சென்செக்ஸ் 581.55 புள்ளிகள் (0.76%) உயர்ந்து 76,929.61 ஆகவும், நிஃப்டி 167.95 புள்ளிகள் (0.72%) உயர்ந்து 23,358.60 ஆகவும் இருந்தது.

காரணம் என்ன?

அமெரிக்க ரிசர்வ் வங்கி தனது வட்டி விகிதத்தை மாற்றமின்றி நீடிப்பது என முடிவு எடுத்திருப்பது சர்வதேச அளவில் பங்குச் சந்தைகளை மீண்டெழச் செய்துள்ளது. அமெரிக்க பங்குச் சந்தை சற்றே சரிவுடன் நிறைவு பெற்றது. ஆசிய பங்குச் சந்தைகளைப் பொறுத்தவரையில் சியோல் மற்றும் டோக்கியோவில் ஏற்றமும், ஷாங்காய் மற்றும் ஹாங்காங்கில் இறக்கமும் நிலவுகிறது.

சர்வதேச போக்குடன், வெளிநாட்டு முதலீட்டாளர்கள் மீண்டும் இந்தியப் பங்குச் சந்தைகளில் முதலீடு செய்ய ஆர்வம் காட்ட தொடங்கியிருப்பதால் சென்செக்ஸ், நிஃப்டி புள்ளிகள் தொடர்ந்து ஏற்றம் கண்டு வருகின்றன. இந்த சாதகப் போக்கு நீடிக்கும் என எதிர்பார்க்கப்படுகிறது.