Stock News: இந்திய பங்குச் சந்தையில் துளிர்க்கும் நம்பிக்கை - காரணம் என்ன?

வங்கி நிறுவனப் பங்குகளுக்கு கூடிய மவுசு, வெளிநாட்டு முதலீட்டாளர்கள் காட்டி வரும் ஆர்வம் உள்ளிட்ட காரணங்களால் இந்திய பங்குச் சந்தைகள் மீண்டு வருகின்றன. சென்செக்ஸ், நிஃப்டி புள்ளிகள் உயர்ந்துள்ளன.

Wednesday February 19, 2025 , 1 min Read

வங்கி நிறுவனப் பங்குகளுக்குக் கூடிய மவுசு, வெளிநாட்டு முதலீட்டாளர்கள் காட்டி வரும் ஆர்வம் உள்ளிட்ட காரணங்களால் இந்திய பங்குச் சந்தைகள் மீண்டு வருகின்றன. சென்செக்ஸ், நிஃப்டி புள்ளிகள் உயர்ந்துள்ளன.

மும்பை பங்குச் சந்தையில் இன்று (பிப்.19) காலை வர்த்தகம் தொடங்கும்போது, சென்செக்ஸ் 386.01 புள்ளிகள் சரிந்து 75,581.38 ஆக இருந்தது. அதேவேளையில், தேசிய பங்குச் சந்தையில் நிஃப்டி 130.45 புள்ளிகள் சரிந்து 22,814.85 ஆக இருந்தது.

இன்றைய வர்த்தக தொடக்கத்திலும் இறக்கம் நிலவினாலும் சில நிமிடங்களில் பங்குச் சந்தை மீண்டெழுந்து தொடர்ச்சியாக உயர்வு காணப்படுவதால் முதலீட்டாளர்கள் நிம்மதி அடைந்தனர்.

இன்று முற்பகல் 10.45 மணியளவில் சென்செக்ஸ் 272.79 புள்ளிகள் (0.36%) உயர்ந்து 76,240.18 ஆகவும், நிஃப்டி 71.50 புள்ளிகள் (0.31%) உயர்ந்து 23,016.80 ஆகவும் இருந்தது.

காரணம் என்ன?

அமெரிக்க பங்குச் சந்தை வர்த்தகம் பாசிட்டிவ் ஆக நிறைவு பெற்றது. ஆசிய பங்குச் சந்தைகளைப் பொறுத்தவரையில் சியோல் மற்றும் ஷாங்காயில் ஏற்றமும், டோக்கியோ மற்றும் ஹாங்காங்கில் இறக்கமும் நிலவுகிறது. இந்த தாக்கம் மட்டுமின்றி, வங்கிப் பங்குகளை உள்ளூர் முதலீட்டாளர்கள் வாங்குவதில் தீவிரம் காட்டி வருவதாலும், வெளிநாட்டு முதலீட்டாளர்கள் மீண்டும் ஆர்வம் காட்டத் தொடங்கியதன் விளைவாகவும் இந்தியப் பங்குச் சந்தைகள் ஏற்றம் பெறத் தொடங்கின.