Stock News: ட்ரம்ப் ‘ஜெர்க்’ எதிரொலி - சரிவுக்குப் பின் மீண்ட பங்குச் சந்தை!

வரிவிதிப்பு நடவடிக்கையில் அமெரிக்க அதிபர் டொனால்டு ட்ரம்ப் சற்றே ‘ஜெர்க்’ ஆகியிருப்பதன் எதிரொலியாக, பங்குச் சந்தைகளில் மீட்சிப் போக்கு தொடங்கியிருக்கிறது. இந்தியப் பங்குச் சந்தைகளைப் பொறுத்தவரையில், மூன்றாவது நாளாக பாசிட்டிவ் தன்மை பரவியிருக்கிறது.

Friday March 07, 2025 , 2 min Read

வரிவிதிப்பு நடவடிக்கையில் அமெரிக்க அதிபர் டொனால்டு ட்ரம்ப் சற்றே ‘ஜெர்க்’ ஆகியிருப்பதன் எதிரொலியாக, பங்குச் சந்தைகளில் மீட்சிப் போக்கு தொடங்கியிருக்கிறது. இந்தியப் பங்குச் சந்தைகளைப் பொறுத்தவரையில், மூன்றாவது நாளாக பாசிட்டிவ் தன்மை பரவியிருக்கிறது.

வீழ்ச்சியும் எழுச்சியும்:

மும்பை பங்குச் சந்தையில் இன்று (மார்ச் 7) காலை வர்த்தகம் தொடங்கும்போது, சென்செக்ஸ் 243.51 புள்ளிகள் சரிந்து 74,096.58 ஆக இருந்தது. அதேவேளையில், தேசிய பங்குச் சந்தையில் நிஃப்டி 53.35 புள்ளிகள் சரிந்து 22,491.35 ஆக இருந்தது.

இன்றைய வர்த்தக தொடக்கத்தில் சரிவு காணப்பட்டாலும் விரைந்து மீண்டு பங்குச் சந்தை ஏற்றம் காணத் தொடங்கியது முதலீட்டாளர்களுக்கு நிம்மதி அளித்துள்ளது.

இன்று முற்பகல் 11.15 மணியளவில் சென்செக்ஸ் 161.80 புள்ளிகள் (0.22%) உயர்ந்து 74,501.90 ஆகவும், நிஃப்டி 59.50 புள்ளிகள் (0.26%) உயர்ந்து 22,604.20 ஆகவும் இருந்தது.

காரணம் என்ன?

அமெரிக்க பங்குச் சந்தையில் வர்த்தகம் வீழ்ச்சியுடன் நிறைவு பெற்றது. ஆசிய பங்குச் சந்தைகளைப் பொறுத்தவரையில் டோக்கியோ மற்றும் சியோலில் சரிவும், ஹாங்காங்கில் ஏற்றமும், ஷாங்காயில் ஏற்ற இறக்கமின்றியும் காணப்படுகிறது.

சர்வதேச அளவில் மட்டுமின்றி அமெரிக்க பங்குச் சந்தைகளிலும் கடும் தாக்கத்தை ஏற்படுத்தியன் எதிரொலியாக, மெக்சிகோ, கனடா நாடுகளில் இருந்து இறக்குமதியாகும் பொருட்களுக்கு 25% வரி விதிக்கும் நடவடிக்கையை ஏப்ரல் 2 வரை அமெரிக்க அதிபர் ட்ரம்ப் இப்போது ஒத்திவைத்துள்ளார். இதனால் பங்குச் சந்தைகள் மீளத் தொடங்கியுள்ளன.

அத்துடன், உள்ளூர் சிறு முதலீட்டாளர்களின் பங்களிப்பின் எதிரொலியாக, இந்திய பங்குச் சந்தையில் தொடர்ந்து மீட்சிப் போக்கு நிலவுகிறது.